វៀតណាម ត្រៀមសាងសង់ព្រលានយន្តហោះបណ្តែតទឹក ដំបូងបង្អស់
តាមការចុះផ្សាយរបស់ VN Express កាលពីថ្ងៃអង្គារទី១៦ខែកក្កដាឆ្នាំ២០២៤, ប្រទេសវៀតណាម កំពុងត្រៀមសាងសង់អាកាសយានដ្ឋានបណ្តែតទឹកនៅខេត្ត Khanh Hoa ជាមួយគោលដៅ ដឹកអ្នកដំណើរដំបូងប្រមាណ១.៥លាននាក់ ក្នុងមួយឆ្នាំ។
តាមសំណើដែលរដ្ឋបាលខេត្តដាក់ជូនក្រសួងដឹកជញ្ជូន, អាកាសយានដ្ឋាន Van Phong នឹងត្រូវសាងសង់លើដីដែលចាក់បំពេញចូលសមុទ្រ ក្នុងទំហំ៤៩៧ហិកតា ហើយទីតាំងនេះគឺអាចប្រើប្រាស់បានទាំងស៊ីវិលនិងយោធា។ វានឹងត្រូវសាងសង់តាមរយៈភាពជាដៃគូរវាងរដ្ឋនិងឯកជន ជាមួយថ្លៃចំណាយសរុប ៧.៩ទ្រីលានដុង (៣០៩លានដុល្លារអាមេរិក)។
អាជ្ញាធរខេត្ត Khanh Hoa បញ្ជាក់ថា អាកាសយានដ្ឋានទាំងមូល នឹងស្ថិតនៅលើផ្ទៃបណ្តែតទឹក ដើម្បីចៀសវាងកុំឲ្យប៉ះពាល់ដល់តំបន់លំនៅដ្ឋានប្រជាជនរស់នៅ ក៏ដូចជាតំបន់ព្រៃឈើដែលគេអភិរក្សផងដែរ ហើយអាកាសយានដ្ឋាននេះទៀតសោត នឹងបំពេញតាមស្តង់ដារកម្រិត 4E ដែលអាចទទួលយន្តហោះធំៗដូចជា A350 និង B787 ជាដើម។
ចំពោះការចំណាយសរុប, រដ្ឋនឹងបញ្ចេញប្រាក់ប្រហែល ២.១៥ទ្រីលានដុង សម្រាប់ធ្វើហេដ្ឋារចនាសម្ព័ន្ធប្រតិបត្តិការហោះហើរ និងការចាក់ដីបំពេញ។
ប្រសិនបើសំណើត្រូវបានអនុម័ត ការងារសាងសង់អាចចាប់ផ្តើមឆាប់ៗក្នុងឆ្នាំនេះ និងត្រូវកំណត់បញ្ចប់រួចរាល់ត្រឹមឆ្នាំ២០២៩។ លើសពីនេះ អាកាសយានដ្ឋាន Van Phong នឹងក្លាយជាព្រលានយន្តហោះបណ្តែតទឹកដំបូងគេបង្អស់ក្នុងប្រទេសវៀតណាម។
Van Phong គឺជាតំបន់សេដ្ឋកិច្ចសំខាន់មួយក្នុងចំណោមតំបន់សេដ្ឋកិច្ចសំខាន់ៗទាំង៣នៅក្នុងខេត្ត Khanh Hoa។ យោងតាមផែនការមេរបស់ខេត្ត Khanh Hoa តំបន់នេះមានផ្ទៃដី១៥ម៉ឺនហិកតា បានដើរតួនាទីឈានមុខក្នុងការទាក់ទាញវិនិយោគិន និងជាកម្លាំងចលករសម្រាប់ការអភិវឌ្ឍសេដ្ឋកិច្ចដល់តំបន់ជុំវិញ កដូចជាទូទាំងប្រទេស។
ខេត្ត Khanh Hoa កំពុងបូមលុយរាប់ពាន់លានដុល្លារចូលទៅក្នុងគម្រោងធំៗចំនួន២៧នៅតំបន់សេដ្ឋកិច្ចផ្តាច់មុខ Van Phong ក្នុងអំឡុងឆ្នាំ២០២៣-២០២៤ ខណៈបច្ចុប្បន្ន ខេត្តនេះបានទាក់ទាញគម្រោងវិនិយោគថវិកាមិនមែនរដ្ឋចំនួន១៧ ដែលមានតម្លៃជិត១០១ទ្រីលានដុង (៤.១៦ពាន់លានដុល្លារអាមេរិក)៕
